«Մասնագիտացում» փուլին կարող են մասնակցել միայն «Բացահայտում» փուլը ամբողջությամբ հաղթահարած աշակերտները։ Այս փուլում առկա են երեք ուղղություններ՝ ծրագրավորում, ռոբոտաշինություն և դիզայն։ Աշակերտը կարող է ընտրել նրանցից որևէ մեկը, կամ միաժամանակ հաճախել բոլոր դասընթացներին։ Կազմակերպվելու են երկարաժամկետ դասընթացներ, որոնցից յուրաքանչյուրը հաջողությամբ հաղթահարելուց հետո աշակերտը դառնում է տվյալ ոլորտի սկսնակ մասնագետ: Այն ավարտելուց հետո աշակերտը կարող է աշխատանքի ընդունվել ՏՏ ոլորտի այն ընկերություններում, որտեղ առկա են տվյալ մասնագետի թափուր աշխատատեղեր։

«Կիրառենք» փուլին կարող են մասնակցել երկրորդ փուլում առնվազն մեկ երկարաժամկետ դասընթաց հաջողությամբ ավարտած աշակերտները։ Այս փուլում աշակերտների կամ խմբակավարների նախաձեռնությամբ ձևավորվում են թիմեր՝ որևէ գաղափարի շուրջ «START-UP» սկսելու նպատակով: Գյուղական համայնքներում ՏՏ ոլորտի մասնագետներ ունենալն առաջին հերթին կհանգեցնի համայնքների արդիականացմանը: Նրանք կարող են արագ ու գրագետ գործարկել ժամանակակից գյուղատնտեսական տեխնիկան, ստեղծել դրանց աշխատանքը մշտադիտարկող (մոնիթորինգ), կազմակերպող ու ավտոմատացնող տեղային համակարգեր, օժանդակել դրանց վերանորոգմանը, կամ իրականացնել ոչ բարդ նորոգում, գյուղական արտադրանքը ներկայացնել թե՛ ներքին, թե՛ արտաքին շուկաներում՝ շուկայի ժամանակակից պահանջներին համապատասխան լուծումներով: Մասնավորապես՝ ստեղծել կայքեր և հավելվածներ գյուղական ենթակառուցվածքներում եղած խնդիրներին արդիական լուծումներ տալու համար, որոնք կարող են հիմք հանդիսանալ արտադրության, առևտրի, տուրիզմի կամ այլ բիզնեսի արդյունավետության բարձրացմանը: Ռոբոտաշինությունից ձեռք բերած հմտությունները կարող են օգտագործվել գյուղատնտեսության ոլորտում առկա մի շարք խնդիրներ լուծելու համար: